কোনটে বাহে কবি গুরু
লেখক সাহিত্যিক,
হামরা গুলা অমপুরিয়ান
হামার গোরত শিখ

ঢং- ছাড় -রং- ছাড়
রক্ত দিয়া লেখ
কবিত্বটাক অস্ত্র বানাও
জাতির- ভিতি দেখ।

ছন্দ গুলাক বজ্র বানাও
কথা গুলাক জ্বালা,
নিজের কথাত করিয়া দে তুই
শত্রুক ঝালা পালা।

আর কিন্তুক লেখিস না তুই
নিজের নামের বাদে,
এমন কিছু লেখিয়া দে তুই
যেটা চেয়াও নাদে।

নয়া কিছু দে ভাই তুই
যেটা আগোত নাছিল।
এমন কিছু চান্দে দে তুই
হক করিবে হাসিল।

নিজোক ভুলি জাতিক টানেক
নিজের কবিতাত,
জাতির -দুঃখ -ভরেয়া দে তুই
শব্দ প্রতিটাত।

আর যদি পাইস তুলিয়া- ধরেক
নিজের জাতির ভূল।
যাতে করি সুদরিবে সোউগ
ভূল হইবে নির্মূল।